မိုးရာသီမှာ မိုးရွာသည်

          ``အရှင်ဘုရား ... ဖြူးဆရာတော် တရားပွဲမှာ မိုးရွာတာ ရှင်ဥပဂုတ်ပွဲမပေးလို့တဲ့။ ဇလုတ်ကြီးမှာတော့ ပွဲပေးလို့ မိုးလွတ်တာလို့ အရပ်ထဲမှာ ပြောနေကြတယ်´´
          ၁၃၆၈-ခု တန်ခူးလကွယ်နေ့တွင် စက်ကြီးကျောင်း၌ ဖြူးဆရာတော်၏ ဆည်းဆာတရားပွဲ ပြုလုပ်ခဲ့၏။ စက်ကြီးကျောင်း၌ ဟောအပြီး ထိုနေ့မှာပင် ဇလုတ်ကြီးရွာ ဘုန်းတော်ကြီးကျောင်း၌ ညတရားပွဲ ပြုလုပ်ခြင်း ဖြစ်၏။
          တရားပွဲမတိုင်မီ ရက်များက မိုးရိပ်မိုးခြေ ရှိသော်လည်း မရွာ။ တရားပွဲကျင်းပမည့် နေ့ကျမှပင် နေ့လည် ၁၂ - နာရီခန့်မှ စ၍ ရွာရာ တရားဟောခါနီး ညနေ လေးနာရီခန့်အထိပင်။ မိုးကလည်း မိမိနေရာတွင် သည်းထန်သလောက် ဇလုတ်ကြီးတွင် အနည်းငယ်သာ ရွာသည်ဟု သိရ၏။
          တရားပွဲမတိုင်မီက အချို့ဒကာဒကာမတို့က ရှင်ဥပဂုတ်ပွဲ ပေးလိုသည့် စကားရိပ်များ ပြတတ်သေး၏။ သို့သော် စာရေးသူက ကျောင်းတွင် ညစဉ်ထေရ၀ါဒဟောပြောပွဲ ပြုလုပ်၍ ထေရ၀ါဒနှင့် မသက်ဆိုင်သည်များကို မပြုလုပ်ရန် ပြောထားသဖြင့် ရဲရဲဝံ့ဝံ့ မလျှောက်ဝံ့ကြချေ။ လျှောက်လာကြလျှင်လည်း ခွင့်ပြုမည်မဟုတ်ချေ။ နောက်ဆုံးတွင်ကား တရားပွဲ မိုးမိသွားလေတော့သည်။
          ထို့နောက် ကဆုန်လဆန်း ၃ ရက်နေ့တွင် ရဟန်းဒကာ ဦးသာခွေးတို့မိသားစုက မိမိအား သိက္ခာထပ်၍ ရှင်ပြုအလှူပွဲ ပြုလုပ်ကြ၏။ ထိုရက်ကိုလည်း မိမိကိုယ်တိုင် စောစောကတည်းက သတ်မှတ်ပေးထားသဖြင့် ဖိတ်စာများ ရိုက်နှိပ်ဝေငှပြီး ဖြစ်နေ၏။ ထို့ကြောင့် ရာသီဥတုအခြေအနေ မကောင်းသော်လည်း ရက်ကိုမူ ရွှေ့ပြောင်း၍ မရနိုင်တော့ပေ။ ထိုနေ့တွင် မိုးသာမက လေကပါ အဆစ်ပါလာလေတော့၏။
          ထိုနှစ်ချက်ကို ကြည့်၍ အရပ်ထဲတွင် ထိုသို့ဝေဖန်နေကြောင်း ဒကာမကြီးတစ်ဦးက မိမိထံ လာရောက် လျှောက်ထားခြင်း ဖြစ်သည်။
          ``ဒကာမကြီး ... ဦးဇင်းလဲ စာသင်သား တစ်ပါးပါ။ ဆရာတော်ကြီးတွေလောက် ပိဋကတ်ကျမ်းဂန် မနှံ့စပ်သေးပေမယ့် အထိုက်လျောက်တော့ လေ့လာထားပါတယ်။ ခုထိတော့ ရှင်ဥပဂုတ္တရဲ့ အတ္ထုပ္ပတ္တိကို ပိဋကတ်တော်တွေထဲမှာ မတွေ့ဖူးသေးဘူး။ ပြီးတော့ မိုးမရွာအောင် ရှင်ဥပဂုတ္တကို ပင့်ပါဆိုတဲ့ ဘုရားရှင်ရဲ့ ဟောကြားချက်ကိုလဲ မတွေ့သေးဘူး။ ဒါကြောင့် အဲဒီအယူအဆကို မယုံနိုင်သေးဘူး´´
ဟု ပြန်ပြောလိုက်၏။
          ``ဒကာမကြီးလဲ စဉ်းစားပါ။ ဒီလောကကြီးဟာ သင်္ခါရလောက၊ သင်္ခါရနယ်။ ဒါကြောင့် ဒီလောကထဲမှာ ရှိရှိသမျှ အရာအားလုံးဟာ ဖြစ်ပြီးလျှင် ပျက်ရစမြဲဆိုတဲ့ နိယာမအတိုင်း ပျက်ချိန်တန်လျှင် ပျက်သွားမှာပဲ။ တန်ခိုးတော်အနန္တနဲ့ ပြည့်စုံတော်မူတဲ့ ဘုရားရှင်လဲ ပရိနိဗ္ဗာန် စံတော်မူသွားပြီ။ ဘုရားရှင်ပြီးလျှင် တန်ခိုးအကြီးဆုံးဖြစ်တဲ့ အရှင်မောဂ္ဂလ္လာန် ကိုယ်တော်မြတ်ကြီးလဲ ပရိနိဗ္ဗာန် စံသွားရပြီ။ ရှင်ဥပဂုတ္တကျမှ ဒီလောက်တောင် အသက်ရှည်တာကို ဦးဇင်းတော့ ဘ၀င်မကျဘူး´´
          ``ပြီးတော့ ရှင်ဥပဂုတ္တကို ရဟန္တာလို့ ပြောကြတယ်။ ပြောကြပါ။ လက်ခံပါတယ်။ တောင်သမုဒ္ဒရာမှာ နေတယ်လို့လဲ ဆိုကြတယ်။ သူတော်ကောင်းတွေဟာ ဆိတ်ငြိမ်ရာအရပ်ကို နှစ်သက်တော်မူကြတယ်။ ဒါကြောင့် ဒါကိုလဲ လက်ခံပါတယ်။ ဆွမ်းစားနောက်ကျလို့ နေနတ်သားက နေလုံးကြီးကို ဆွဲထားရတယ်တဲ့။ ဒီလို ဆွဲထားလို့ ရစတမ်းလား။ ဒီလိုဆွဲထားလို့ရော အချိန်က မကုန်တော့ဘူးတဲ့လား။ ဒါစဉ်းစားရမယ့် အချက်နော်။ ရဟန္တာတွေဟာ လောကကို ကမောက်ကမဖြစ်အောင် လုပ်မယ်လို့ ဦးဇင်းတော့ မယုံကြည်ဘူး။
          ``ပြီးတော့ ရှင်ဥပဂုတ္တဆွမ်းစားပြီးလို့ နေနတ်သားက နေကို လွှတ်လိုက်တော့ နေတော်တော်စောင်းသွားပြီတဲ့။ ဆွမ်းစားတာဟာ အဲဒီလောက်တောင် ကြာရဲ့လား။ လက်တွေ့ကျကျ စဉ်းစားကြည့်ရင် ဒီအချက်တွေဟာ လက်ခံချင်စရာ မရှိဘူး။´´
          ``ရှင်ဥပဂုတ္တဆိုတဲ့ ရဟန္တာမထေရ်မြတ်ကြီး တကယ်ရှိတယ်ပဲ ထား။ ဦးဇင်းကတော့ မပင့်ဘူး။ ဘာဖြစ်လို့လဲဆိုတော့ အလှူတွေဆိုရင် ဦးဇင်းတို့ ပုထုဇဉ်ရဟန်းတွေက သံဃာစင်ပေါ်မှာ မိန့်မိန့်ကြီး ထိုင်လို့။ ဆွမ်းကောင်းဟင်းကောင်းတွေ ဘုဉ်းပေးလို့။ အလှူပြီးတော့လဲ လှူဖွယ်ဝတ္ထုတွေ ခံယူလို့။´´
          ``ရဟန္တာရှင်ဥပဂုတ္တကျတော့ သံဃာစင်ရဲ့ နောက်နားလေးမှာ စားပွဲကလေးတစ်လုံးချ၊ ထီးစုတ်ကလေး မိုးပေးလို့။ ရဟန္တာတော့ ပင့်ပြီး နေရာပေးထားကြတာတွေက ပုံစံ မကျဘူး။ ဆွမ်းဆိုလဲ ပန်းကန်ပြားလေးနဲ့ စတိလောက်ပဲ ထည့်ကပ်ထားတာ။ အင်မတန် အားနာစရာကောင်းတယ်။ ပင့်တဲ့ ရည်ရွယ်ချက်ကလဲ မကောင်းဘူး။ ပုထုဇဉ် ရဟန်းတွေ ကိုရင်ကလေးတွေကျတော့ အလှူကို ပင့်တာ အပူဇော်ခံဖို့ ပင့်တာ။ ရဟန္တာကြီးကျတော့ လုပ်အားပေးဖို့ပင့်တာ။ ဦးဇင်းက ကတ်သတ်ပြီး ပြောနေတာ မဟုတ်ဘူး။ ရိုးရိုးစင်းစင်းကလေး တွေးပြီး ပြောတာပါ။´´
          ``ထေရ၀ါဒဗုဒ္ဓဘာသာဝင် ရဟန်းတစ်ပါးအနေနဲ့ ကိုယ့်သာသနာက ရဟန္တာအရှင်မြတ်ကြီးတွေကို မလေးမစား မလုပ်ချင်ဘူး။ ဒါကြောင့် ရှင်ဥပဂုတ္တရဟန္တာရှိတယ်လို့ ပိဋကတ်ထဲမှာတွေ့ရင် ယုံမယ်။ မတွေ့သေးရင် မယုံသေးဘူး။ ခုလက်ရှိ သိရသလောက် အတ္ထုပ္ပတ္တိလေးနဲ့လောက်တော့ မယုံနိုင်သေးဘူး။ တွေ့မိလို့ ယုံကြည်သွားပြီဆိုရင်လဲ မိုးတားဖို့အတွက်တော့ မပင့်ဘူး။ ဒါ ဦးဇင်းရဲ့သဘောထားပဲ´´
          ရှင်ဥပဂုတ္တပြဿနာက ဤမျှဖြင့် မပြီးသေးပေ။ ကဆုန်လဆန်း ၁၂ ရက်နေ့တွင် မိမိအား သိက္ခာထပ်အလှူတစ်ခု ရှိလာပြန်သည်။ အလှူအစနေ့တွင်လည်း လေက ငြိမ်နေ၏၊ မိုးကား ရွာဆဲ။ အလှူအစနေ့တွင် မြို့ထဲ သွားစရာရှိသဖြင့် အလှူအိမ်ကို လမ်းကြုံဝင်ကြည့်ရာ မိမိက အိမ်ပေါ် ရောက်သည်နှင့် မိုးကလဲ ဝေါကနဲ ရွာချလေးတော့သည်။ အိမ်ပေါ်တွင် အလှူရှင်မိသားစုနှင့်အတူ အခြားလူကြီး လေးငါးယောက် ထိုင်စကားပြောနေကြသည်။ အလှူရှင်၏သမီး ဆရာမက ``ဦးဇင်းက မိုးခေါ်လာတယ်´´ဟု ဆီး၍ လျှောက်၏။
          ဆရာမ စကားအဆုံးတွင် လူကြီးတစ်ယောက်က အကွက်ရပြီဟူသော မျက်နှာပေးဖြင့် မိမိကို ကြည့်၍
          ``အဲဒါပေါ့ဘုရား။ မိရိုးဖလာဆိုတာ မပယ်ကောင်းဘူး။ ဒါကို အလေးမမူတော့ စိတ်အနှောင့်အယှက်ဖြစ်ရတာပေါ့´´ ဟု လျှောက်၏။
          အလှူရှင်ဒကာကြီးအပေါ် သြဇာညောင်းသည့် ထိုဒကာကြီးက ရှင်ဥပဂုတ်ပွဲမပေးသဖြင့် အလှူရှင်မိသားစုကို ဆူနေစဉ် မိမိကရောက်သွားခြင်း ဖြစ်၏။ မိမိရောက်လာသည်နှင့် ထိုဒကာကြီးက အားကိုးရပြီဟူသော အထင်ဖြင့် ထိုအကြောင်းကို ဆက်လာခြင်း ဖြစ်သည်။ အဆုံးတွင် ``အရှင်ဘုရားဒကာတွေကို ကြည့်ပြောပါအုံး´´ ဟု လျှောက်ရင်း နိဂုံးချုပ်လိုက်သည်။
          ``ခက်တာပဲ ဒကာကြီး။ ရှင်ဥပဂုတ်ပွဲပေးလိုက်လို့ မိုးမရွာတော့ဘူးဆိုရင် `မိုးမရွာစေချင်ရင် ရှင်ဥပဂုတ်ပွဲ ပေးရတယ်´ဆိုတဲ့ အယူအဆကြီးက စွဲသွားလိမ့်မယ်။ ဒီအယူအဆဟာ ဣဿရနိမ္မာန၀ါဒ (တန်ခိုးရှင်ဝါဒ)နဲ့ အတူတူပဲ။ ဒါကို ဘုရားရှင်က သီလက္ခန္ဓ၀ဂ္ဂပါဠိတော်မှာ ဒိဋ္ဌိအယူထဲ ထည့်ဟောထားတယ်။ ´´
          ``ပွဲပေးပါလျက် မိုးရွာရင်လဲ `ရှင်ဥပဂုတ်လဲ မကယ်နိုင်ပါလား´ ဆိုတဲ့ အတွေးမျိုးဝင်လာတတ်တယ်။ ဒီအတွေးဟာ ဘာမှ မဖြစ်လောက်ဘူးလို့ ထင်ရပေမယ့် ယုံကြည်မှုသဒ္ဓါတရားကို ထိပါးစေနိုင်ပါတယ်။ မိုးမရွာအောင် လုပ်ဖို့ မသင့်တော်ပါဘူး။ မိုးဦးကျချိန်ပဲ။ သတ္တ၀ါတွေအတွက် သူ့ရာသီမှာ သူရွာတာ ရွာစမ်းပါစေ။ အလှူအထမြောက်ဖို့သာ အဓိကပါ။´´
ဟု ပြောလိုက်ရာ ထိုဒကာကြီးလဲ ဦးချ၍ ထပြန်သွားလေတော့သည်။
          ကံကောင်းထောက်မစွာဖြင့် နောက်နေ့ အလှူပွဲတွင် မိုးသားတိမ်လိပ်တို့ ကင်းစင်စွာဖြင့် အလှူပွဲကြီး ထမြောက် အောင်မြင်ခဲ့ပါသည်။
          ထို့ကြောင့် ရှင်ဥပဂုတ်ပွဲမပေးသဖြင့် တရားပွဲ မိုးရွာသည်ဟု လျှောက်သော ဒကာမကြီးအား ရှင်ဥပဂုတ်ပွဲ မပေးသော်လည်း အလှူပွဲ မိုးကင်းသည်ဟု လှမ်း၍ ပြောလိုက်ပါတော့သည်။
ဤဆောင်းပါးကိုလည်း ဖယ်ရှားပါ တွယ်ထားပါ စာအုပ်တွင် ရေးသားခဲ့ပါသည်။